Do’s and Don’ts in Watching Movie in Theaters

Marami sa atin ang mahilig manood ng pelikula lalo na at ang bidang artista ay ating paborito at iniidolo. Maging tagalog o ingles mang palabas ating binibigyan oras upang matunghayan ang kuwento at masilayan ang pagganap ng mga sikat na artista. Narito ang ilang mga paalala at mga dapat tandaan upang maging hassle free ang ating panonood.

Don’ts

• Iwasan ang pag-iingay at pag-uusap ng malakas sa loob ng sinehan. Malaking respeto sa iba kung hindi tayo mag-iingay habang nanonood. Ang pag-uusap ay nakakaagaw ng pansin dahil halos magkakalapit lamang ang mga upuan sa loob ng sinehan. Kung kaya magnda kung iiwasan ito.

• Iwasan ang pagtataas ng paa at pagsipa sa unahang upuan. Karaniwan nating napapansin na maraming kabataan ang nagtataas ng paa sa loob ng panooran. Hindi ito magandang gawi kahit pa wala namang nakaupo sa harap na upuan. Paggalang ito sa susunod na gagamit, kung kaya hindi dapat itong pagtaasan ng paa. Ang pagsipa ay nakakagambala din sa panonood ng taong nakaupo sa ating unahan, huwag itong gawin.

• Iwasan ang pagdadala ng smelly o maamoy na pagkain sa loob ng sinehan. Ang pagdadala ng mabaho o hindi kaiga-igayang pagkain sa loob ng panooran ay maaring makaistorbo ng maraming manonood. Hindi agad makakalabas ang amoy nito dahil kulong ang loob ng sinehan. Kung kaya ipinagbabawal ang pagdadala nito.

• Ilagay sa silent mode ang cellphone upang hindi makaabala sa ibang nanonood. Lagi nating dala ang ating mga cellphone. Kailangang ilagay ito sa silent mode upang hindi makaistorbo sa iba. Kung may tawag na kailangang-kailangang sagutin maaring lumabas pandalian upang kausapin ang tumawag.

• Kung may kasamang bata, iwasang maglikot at maging makulit ito sa loob ng sinehan. Pangkaraniwan na sa mga pambatang palabas ang magsama ng mga bata sa loob ng panooran. Pagsabihan itong huwag maglikot at maging makulit habang nanonood. Kung nagwawala ito o umiiyak, maaring ilabas muna ang bata hanggang sa kumalma ito upang hindi makabulahaw sa ibang tao.

Do’s

• Alamin ang lokasyon ng mga exit doors. Mahalagang alam natin kung saan ang emergency or exit doors sa loob ng sinehan. Kung may hindi inaasahang pangyayayri alam natin kung saan tayo puwedeng dumaan upang makalabas.

• Mag-CR na bago magsimula ang palabas. Ayaw nating maabala sa panonood ng sine lalo sa magandang parte kung bigla tayong kailangang gumamit ng CR. Kung kaya bago pumasok o magsimula ang palabas mag-CR muna.

• Bago pumunta sa sinehan alamin kung ano ang gustong panoorin at oras ng simula nito. Hindi natin gustong masayang ang ating oras sa paghihintay ng angkop na oras ng palabas. Kung kaya bago manood silipin sa internet kung ano anung oras ang simula nito. Pumili na din ng gustong pelikula upang hindi na mag-aksaya ng panahon sa pagpapasya kung alin ang pipiliin.

• Bumili ng pagkain o kumain muna bago manood ng pelikula. Masarap habang nanonood yung may popcorn kang kinakaen. Madalas na mas mahal ang pagkaen sa bilihan malapit sa sinehan. Hindi naman pinagbabawal ang pagdadala ng pagkaen sa loob kung kaya maari tayong magdala ng ating gusto, basta huwag lamang itong maamoy na pagkain.

• Magsuot ng kumportableng damit. Hanggat maari magsuot ng kumportableng kasuotan. Mahirap manood ng nasisikipan o hindi kumportable ang iyong damit. 

Ilan lamang ito sa mga angkop na kaugalian at gawain upang mas maging enjoyable ang ating panonood. Irespeto ang bawat isa sa sinehan. Iwasan ang mga bagay na dapat iwasan upang hindi makaakit ng kaguluhan at istorbo sa ibang tao. Sa pamamagitan nito siguradong magiging masaya ang ating experience sa bawat pelikulang ating papanoorin.

MMFF 2016 Movie Entries

Maraming pagpipilian ang mga manonood ngayong araw ng kapaskuhan dahil sa naiibang entries ngayong taon na ito. Piniling maigi ng komite ng MMFF ang mga makakapasok sa taunang patimpalak ng pelikulang Pilipino. Narito ang mga pelikulang nakapasok at maaring panoorin simula Disyembre 25, 2016.

1. Die Beautiful

Nanalo ng Best Actor at Audience Award ang pelikulang ito sa 29th Tokyo International Film Festival. Si Paolo Ballesteros ay si Trisha isang bakla na sinasalihan lahat ng gay beauty contest. Mapagmahal sa mga bata at mabait na kaibigan. Magaling siyang mag-ayos sa sarili na parang totoong babae. Tunghayan natin ang buhay ni Trisha sa Die Beautiful. 

Bida sa Pelikula: Paolo Ballesteros, Joel Torre, Gladys Reyes, Luis Alandy, Albie Casino

Direktor: Jun Robles

2. Kabisera (inspired by true story)

Kuwento ng isang pamilya na sinubok ng isang pangyayari. At ang tumayong ilaw nila ang isang ina at asawa sa pagsubok na iyon. Panoorin kung paano muling bumangon ang isang pamilya sa nangyari sa kanilang buhay.

Bida sa Pelikula: Nora Aunor, Ricky Davao, JC de Vera, Jason Abalos, RJ Agustin, Victor Neri, Ronwaldo Martin

Direktor: Arturo “Boy” San Agustin & Real Florido

3. Saving Sally (a teen film)

Si Marty ay isang comic book artist na lihim na nagmamahal sa kaniyang best friend na si Sally na isang nerd at gadget inventor. Ngunit gaya ng maraming love story, maraming hadlang dito. Una ang nakakatakot nitong mga magulang at ang pangalawa may boyfriend si Sally. Walang magawa si Marty kundi ang pagpantasyahan na inililigtas ang kaniyang pinakamamahal mula sa masamang mundo. May halong animation itong pelikula at panoorin kung ano ang kahihinatnan ng love life ni Marty.

Bida sa Pelikula: Rhian Ramos, Enzo Marcos, TJ Trinidad

Direktor: Avid Liongoren

4. Oro

Isang babae si Adlawan na nanunungkulan sa kanilang lugar. Tahimik na namumuhay ang mga tao dito sa pamamagitan ng pagmimina ng ginto. Ngunit isang araw pinagbawalan sila sa pagmimina na ikinabubuhay ng mga tao sa baryo dahil sa kawalan ng permit.

Bida sa Pelikula: Irma Adlawan, Mercedes Cabral, Joem Bascon

Direktor: Alvin Yapan

5. Ang Babae Sa Septic Tank 2

Nagbabalik si Eugene Domingo para sa pangalawang serye ng Ang Babae sa Septic Tank 2. Sa kuwentong ito tatalakayin kung paano gumawa ng pelikulang nakakakilig at papatok sa takilya. Makakasama ni Domingo si Jercho Rosales bilang kapareha niya. Ang daming hugot at patama ng palabas na ito sa teaser pa lang.

Bida sa Pelikula: Eugene Domingo, Jericho Rosales, Kean Cipriano, Cai Cortez, Khalil Ramos, Joel Torre

Direktor: Marlon Rivera

6. Sunday Beauty Queen (Tokyo Documentary)

Ito ang dokumentaryong kuwento tungkol sa buhay ng mga OFW na helper sa Hongkong. Nagpapakita ng pagiging beauty queen nila tuwing linggo kapag sila ay nagkakasama-sama. Ito ang klase ng movie na walang bidang sikat na artista. Kaya tiyak na tunay na buhay ang maihahatid sa atin ng totoong kalagayan ng mga kababayan natin sa Hongkong.

Bida sa Pelikula: Hazel Perdid, Maylyn Jacob, Cherry Bretania, Leo Selomenio

Direktor: Baby Ruth Villarama

7. Vince & Kath & James

Hango sa social media serye na ‘Vince & Kath’ ni Jenny Ruth Almocera. Kuwento ng matalik na magkaibigan na Vince at Kath. Ng dumating si James gusto nito paibigin si Kath sa pamamagitan ng pagtetext dito. At si Vince ang kaniyang ginamit upang itext si Kath bilang si Var. Napaibig ang dalaga at ng magkita na sila si James na ang nagpakilala. Maitatago kaya ni Vince ang tunay niyang nararamdaman kay Kath?

Bida sa Pelikula: Julia Barretto, Joshua Garcia, Ronnie Alonte, Maris Racal, Shamaine Buencamino, Jeric Raval

Direktor: Theodore Boborol

8. Seklusyon

Ayon sa kuwento pinakamalakas ang tawag ng demonyo sa huling pitong araw ng mga diyakono. Upang malayo sila sa tukso itinatago sila ng simbahan sa isang liblib na lugar. Ngunit ang lugar na ito ay pinagtaguan upang maligtas ang mapaghimalang bata na si Anghela Santa Ana. At ditto nagsimula ang mga kakaibang kaganapan sa lugar. Alamin ang kuwento ng Seklusyon na huling ginawa ng simbahan noon pang 1947.

Bida sa Pelikula: Rhed Bustamante, Phoebe Walker, Elora Espano, Neil Ryan Sese, Ronnie Alonte, Lou Veloso, Dominique Roque, John Vic De Guzman, JR Versales

Direktor: Erik Matti

Movie Review: The Escort

Petsa nang Pagpapalabas: Nobyembre 2, 2016

Haba nang Pelikula: 1oras 45minuto

Direktor: Enzo Williams

Kategorya: Drama, Romance

Panulat ni: Senedy Que

Prodyusers: Lily Y. Monteverde, Roselle Y. Monteverde

Bida nang Pelikula:

• Derek Ramsay bilang si Cyrus delos Reyes/Cedric dela Cruz – kasosyo ni Lucy sa Luxe Escort agency, umibig kay Yassi.
• Lovi Poe bilang si Yassi – umibig kay Cyrus, nagustuhan ni Gary at receptionist sa Luxe Escort agency.
• Christopher De Leon bilang Gary Montenilla – nagtaksil at nagkaanak sa iba ang tunay na asawa, umibig kay Yassi.
• Jean Garcia bilang si Lucy – may asawang mayor, ekslusibong escort si Cyrus.
• Dimples Romana bilang Brenda – isa sa mga escort girl sa Luxe agency.

Musika: Jessie Lasaten

Sinematograpiya: Lee Briones-Mailey, Sherman Philip So

Taga-ayos: Vito Cajili

Taga-pamahagi: Regal Entertainment Inc.

Bansa: Plipinas

Lingguwahe: Tagalog, Filipino

Buod:

Unang kita pa lang ni Cyrus kay Yassi nagustuhan na agad niya ito. Kung kaya inalok niya ng trabaho sa kaniyang agency na tinaggap naman ng dalaga. Naging receptionist si Yassi sa Luxe Escort agency na nagbibigay aliw sa mga parokyano nitong lalaki. Nakilala niya si Gary at pilit siyang ibinebenta sa lalaki ni Cyrus. Nagustuhan si Yassi ni Gary ngunit ang puso niya ay tanging si Cyrus lang ang laman. Nang makilala ni Cyrus si Yassi at umibig din dito, tinapos niya ang ugnayan niya kay Lucy bilang ekslusibong escort. Si Lucy ay may asawang mayor na nakakulong. Ngunit ng lumaya ito nalaman ang kataksilan ng asawa at hinanap si Cyrus.

Pagsusuri:

Ito ang unang pagtatambal nina Lovie Poe at Derek Ramsay sa isang pelikula. Sa teaser pa lang kitang kita ang gandang lalaki ni Ramsay at ang sexy pigura ni Poe. Ito ay isang sexy film na handog nang Regal Entertainment Inc at sa direksyon ni Enzo Williams.

 Ang kuwento ay nagsimula kung saan si Yassi ay nagsisilbi bilang waitress sa isang okasyon na ang mga babae ay tinatawag na escort. Nakita niya na malaki ang kinikita ng mga babae na andoon. Nakita  ito ni Cyrus at inoferan agad siyang magtrabaho para sa kaniya bilang isang receptionist sa Luxe Escort agency nito. Si Cyrus ay kasosyo ni Lucy sa agency at ekslusibong escort din ni Lucy na may asawang mayor. Pagpasok niya sa opisina nakita siya ni Gary Montenilla na kamamatay lang ng asawa. Matagal na itong nililigawan ni Cyrus na kumuha ng escort sa kanila at nagustuhan nga nito si Yassi na hindi naman isang escort. Ngunit pinainan si Yassi ng pera ni Cyrus upang pakisamahan si Gary na hindi nagustuhan ni Yassi. Hindi inaasahang habang ginagawa ito ni Cyrus sa kanya, naramdaman ni Cyrus na mahal na niya ang dalaga at ayaw nitong ibigay siya sa iba kung kay minahal din siya ni Yassi. Bumalik ang asawa ni Lucy at hinanap si Cyrus dahil sa kataksilan ng mga ito. Walang ibang mahingan ng tulong si Yassi kundi si Gary.

Maraming parte sa pelikula ang hindi masyadong naipaliwanag at walang sagot hanggang sa matapos ang pelikula. Kagaya na lang ng paano nakilala ni Lucy si Cyrus, anong ginawa ng mayor sa asawang niyang si Lucy. Masyadong nagpokus ang direktor sa karakter nina Yassi at Cyrus kung kaya ang ibang eksena ay bitin at iniwan na lang sa mga manonood ang posibilidad na nangyari. Ang bagal nung istorya sa simula tapos nung kagitnaan biglang bumilis na ang daming nangyayari. Hindi nabigyan nang tamang oras ang kada sitwasyon upang mas mailahad ng mabuti ang kuwento at mas maramdaman ng manonood ang nais nitong maipaabot sa lahat.

Epektibo si Lovi Poe sa papel niyang virgin na receptionist. Hindi ganun kalalim, tama lang para sa hinihingi ng karakter niya. Hindi ko maramdaman yung sincerity sa papel ni Derek. Hindi mo mafeel yung pag-ibig ni Cyrus kay Yassi. Ultimo yung mga pag-iyak niya at mga linyang sinasabi hindi nakakaantig ng puso. Parang wala lang, sinabi niya lang tapos wala na. Samantalang sina Garcia at De Leon, alam mong batikang batikan na sa mga pagganap.

Yung mga linyang ginamit, although malaman naman kaso yung pagsasabi ng karakter, nakadepende dun kung tatak siya sa manonood at maalala nila. Sa kaso sa palabas na ito hindi ito naachieve.

Nahirapan ang pelikula sa execution ng palabas upang mas maintindihan ito. Marami ang naiwang tanong na ipinagpalagay na lang sa pamamagitan sa mga pansariling konklusyon.

10 Must see Acts on ‘The Super Parental Guardians’

Dinumog nang manonood ang muling pagtatambal sa pelikula nina Vice Ganda at Coco Martin sa kanilang pinakamaagang  pamaskong handog na “The Super Parental Guradians”. Kasama pa ang dalawang break out child stars ngayon na sina Awra Briguela at Onyok Pineda at sa direksyon ng batikang director na si Bb. Joyce Bernal. Maraming eksena ang tumatak at nakatutuwa sa palabas na ito na siguradong kagigiliwan nang mga manonood. Narito ang ilang parte na kinaaliwan nang mga tao.

1. Paglabas ni Emie.

Hindi inaakala ng lahat na masasama ang magandang si Bela Padilla bilang Emie sa palabas na ito. Kahit special na partisipasyon lamang ang ganap ni Padilla, nakakuha naman ito ng atensyon ng mga manonood dahil sa kagandahang taglay ng dalaga sa papel na astig na girlfriend nang sigang si Joem Bascon. Siya ay pinag-aagawan nina Paco (Coco) at Jake (Joem) kung kaya nagkaroon nang laban ang dalawang grupo.

2. Pagtawag ng tulong dahil nasaksak si Sarah.

Gumanap si Matet de leon bilang si Sarah na kapatid ni Paco (Coco) at kaibigan ni Arci (Vice). Nakakatawa yung pagkasaksak niya at humihingi siya nang tulong. Ang dami pang tinawagan ni Arci hanggang sa huli si Sarah pa mismo ang tunay na tumawag sa 911.  Kwela yung eksena kasi natataranta sina Lassy at MC kasama si Vice kung anong gagawin. Hindi din agad nalaman ni Matet na nasaksak pala siya.

3. Riot sa bubong ng squatter’s area.

Ito ang naging opening ng pelikula. Makapigil hininga ang pagtalon talon ni Coco sa mga bubong sa squatters area kasama sina Benny at Miko Matos na kapwa kasama niya sa gang. Tunay na hindi mapapantayan ang galing ni Coco pagdating sa mga aksyon scenes.

4. Paligsahan sa spaghetti.

Nagpaligsahan sa eksenang ito sina Awra at Vice sa spaghetti nilang niluto para sa mga nagtratrabaho sa renovation ng bahay na tinitirhan nila. Una nagpakita ng niluto si Awra na gawa daw ang kaniyang spaghetti sa fresh pick ripe tomatoes, samantalang ang kay Vice Ganda naman ay spaghetting mayroong antibiotic, antihistamine, gluthatione at Ginkgo Biloba.

5. Pagtatanggol Ni Vice kay Awra laban sa batang umaaway sa kaniya.

Naabutan ni Vice na inaaway si Onyok at Awra ng tatlong bata. Sinabihan si Awra ng bata na batang ulila, na inulit naman ni Vice sa bata kung bakit tinawag niya si Awra na batang ulikba na mas masakit sa sinabi ng batang umaaway sa kaniya.

6. Sambutan nang bola at paligsahan sa pagposing.

Sumali sina Vice at Awra sa paligsahan nila sa school at gumanap si Vice bilang nanay nang mga ito. Habang nagsasambutan ng bola nagpaligsahan ang dalawa sa pagpose matapos maihagis ang bola sa magkabilang panig. Laughtrip ang mga pose nina Vice at Awra.

7. Pagsayaw ni Vice at Awra.

Makapigil hiningang stunt ang ginawa nina Vice at Awra sa production number nilang sayaw bilang mag ina sa school. Halos mabali ang buto ni Awra sa paghahagis hagis dito sa ere. At nahilo naman si Vice nung siya naman ang inihagis.

8. Nakakatakot na paglabas ni Matet.

Nakakatawang nakakatakot ang pagmumulto ni Sarah kina Vice at Coco. Bagamat laging may dalang balut si Matet dito dahil adik siya doon hindi pa din naitago ang nakakagulat niyang pagsulpot. Isang eksena dito ay ang biglang pagpapakita ni Matet sa labas ng pinto ni Vice pagbukas niya nito.

9. Dramatic scene ni Vice at Coco.

Kilala natin si Vice sa mga punchlines at nakakatawang kilos. Kaya marami ang magugulat sa dramatic scene nila ni Coco tungkol sa walang nagmamahal na tao kay Vice na pinabulaanan naman ni Coco na umabot sa matinding sagutan ng linya ng dalawang bida. Ramdam mo yung acting ni Vice sa eksenang ito.

10. Pagkanta ni Coco.

Isang pasabog sa ending part ng palabas ang pagkanta ni Coco na hindi niya madalas ginagawa sa iba niyang pelikula. Kumanta si Coco ng Wag Ka Nang Umiyak sa huling bahagi nang akala niya ay namatay sa pagsabog si Vice.

Kayo, anong paborito ninyong eksena?

The Super Parental Guardians: Movie Review

Petsa nang Pagpapalabas: Nobyembre 30, 2016

Haba nang Pelikula: 1oras 45minuto

Direktor: Bb. Joyce Bernal

Kategorya: Komedya, Drama, Horror, Aksyon

Istorya ni: Jose Marie Viceral, Rodel Nacianceno

Sinulat ni: Vice Ganda, Coco Martin

Script ni: Danno Kristoper Mariquit

Prodyusers: Charo Santos-Concio, Malou N. Santos

Bida nang Pelikula:

• Vice Ganda bilang si Arci/Ariel Siriaco – kaibigan ni Sarah at ninong nina Megan at Ernie.
• Coco Martin bilang si Paco Gaspar – kapatid ni Sarah.
• Matet de Leon bilang si Sarah Gaspar – kapatid ni Paco at ina nina Megan at Ernie.
• Awra Briguela bilang si Melvin Gaspar/ Megan - anak ni Sarah.
• Onyok Pineda bilang si Ernesto/Ernie Gaspar – anak ni Sarah.
• Kiray bilang si Liza – kaibigan ni Arci.
• Lassy Marquez bilang si Nadine – kaibigan ni Arci.
• MC Calaquian bilang si Kathryn – kaibigan ni Arci

Kanta:”Ang Kulit” ni Vice Ganda

Taga-ayos: Joyce Bernal

Taga-pamahagi: StarCinema

Bansa: Pilipnas

Lingguwahe: Tagalog, Filipino

Buod:

Si Paco ay lider ng isang gang at laging napapaaway, nang namatay si Sarah ang kaniyang kapatid napilitan siyang maghanap ng ibang matutuluyan para sa kaligtasan ng dalawa niyang pamangkin. Nakilala niya si Arci na kaibigan ni Sarah at ninong ng mga bata. Si Arci ay isang assistant kay Madam Marife na magiisponsor sa kaniya upang makapunta siya ng Korea. Nagtulungan sina Paco at Arci upang hanapin ang pumatay kay Sarah at kung sino ang tunay na ama ng mga anak nito.

Pagsusuri:

Pinagsama-samang aksyon, drama, horror at komedya ang maagang pamaskong handog nina Vice Ganda at Coco Martin na “The Super Parental Guardians”. Sinamahan pa sila ng dalawang breakout child stars na sina Onyok Pineda at Awra Briguela at sa direksyon ni Bb. Joyce Bernal. Humakot ang palabas ng maraming manonood ng unang araw ng pagpapalabas nito.

Sa simula pa lang ng kuwento ay maaksyon na agad ang mga unang eksena ni Coco kung saan nakikipaghabulan at nakikipag-away siya sa kalabang gang group na pinamumunuan ni Joem Bascon. Pinag-aawayan nila si Emee at kung sino talaga ang tunay nitong nobyo. Si Coco ay si Paco na lider ng isang grupo sa kanilang lugar na madalas maraming patayan. Palagi siyang pinagsasabihan ng kaniyang kapatid na si Sarah na tumigil na sa pakikipag-away para na din sa dalawang pamangkin nito na sina Megan at Ernie.

Magkaibigan matalik naman sina Arci at Sarah na nangako sa isa’t isa na magiging pangalawang magulang sila ng kani-kanilang mga anak. Nang mamatay si Sarah hinabilin niya ang kaniyang mga anak kay Arci at Paco. Si Arci ay isang assistant kay Madam Marife na siyang nagiisponsor sa kaniya upang makapunta sa Korea. Pansamatalang tumira si Arci sa bahay ni Marife upang bantayan ang renovation nito. Dito niya din muna pinatira sina Paco at ang dalawang bata upang malayo sa kaguluhan sa dating tirahan ni Paco. Madalas magpakita kina Paco at Arci si Sarah dahilan upang hanapin nilang dalawa ang tunay pumatay kay Sarah at ama nina Megan at Ernie.

Maganda yung execution ni Bernal sa pelikulang ito. Hindi nagmamadali at hindi din boring. Tamang tama lang ang bawat eksena. May kani kaniyang parte ang bawat karakter. Hindi nag-aagawan o nagsasapawan sa mga eksena. Nabuild up niya yung magandang distribusyong sa bawat isa.

Ito yung bersyon ni Vice Ganda ng pelikula na hindi siya trying hard magpatawa. May kuwento at kaunting lalim na ibinahagi sa pelikula. Hindi lang siya puro bato ng punchline kagaya ng dati niyang ginagawa sa iba niyang palabas. Maganda yung kombinasyon nila ni Coco na nagbigay kulay sa karakter nilang dalawa sa pelikula. Hindi siya puro patawa, may mga seryosong eksena din lalo sa parte ni Coco.

Yung kuwento nilapatan nila ng iba’t ibang elemento. Hindi lang nagpapatawa kundi may aksyon at labanan ding kasama. May isinama ding kaunting horror na magpapagulat pa din sa manonood. At drama na hindi mo inaasahan na kukurot sa iyong puso sa bawat linyang binibitawan.

Makakarelate ka talaga sa mga linya dito lalo sa eksena ni Vice at Coco at yung kay Awra at Vice. Hindi lang siya puros patawa kundi may kasamang emosyon. Siguro tama nga yung sinasabi nila na kung sino pa yung mga artistang nagpapatawa sila yung mas malalim ang pinagdadaanan sa buhay na kitang kita mo sa bawat bigkas ni Vice ng kaniyang linya.

Maayos din pinakita ang pagkakaiba nina Coco at Vice sa pelikula. Si Coco bilang lider ng gang group ay nilagyan nila ng kulay ang buhok at mahabang buntot, pati ang damit nito ay pang astig na lider samahan pa ng maraming tattoo. Samantalang nakakatuwa naman ang mga damit ni Vice na mas nagpapakita ng tunay niyang pagkatao. Makulay ito at nakakatutuwa sa ginagampanan niyang karakter.

Beterano na sina Vice at Coco sa mga ganitong pelikula. Maayos na nagampanan ni Coco ang kaniyang karakter at wala pa din siyang kupas pagdating sa mga aksyon at labanan. Kakaibang Vice Ganda naman ang pinakita dito ni Vice, yung mga punchline niya andoon pa din pero mas nadagdagan pa ito ng maayos niyang naideliver ang mga dramatic scenes niya. Hindi din nagpatalo sina Onyok at Awra at nakipagsabayan sa pag-arte sa dalawang bigating artista. Hindi sila nagpahuli sa pagbato ng mga linya at maayos nilang ito naipakita kahit bata pa lang sila.

Isang pasabog ang hindi ninyo dapat palampasin sa ending ng pelikula. Tiyak na matutuwa kayo at uuwing may ngiti sa mga labi. Kaya huwag palampasin at sugod na sa mga sinehan.

10 Kilig Pinoy Movies of All time

Sino ba ang hindi kikiligin sa mga pelikulang Pilipino? Hindi lang ang magandang chemistry ng dalawang bida ang inaabangan kundi pati ang magandang kuwento na talagang magpapasaya at magpapakilig sa mga manonood. Nakakadagdag pa ang mga hindi malilimutang eksena at linya na tumatak sa mga tao hanggang sa ngayon. Inipon ko ang ilan sa mga hindi malilimutang pelikula mula noon hanggang ngayon na siguradong hindi ninyo pagsasawaang panoorin ng paulit ulit. Corny, baduy, pero aminin ninyo nakarelate din kayo sa ilang mga palabas na ito.

1. A very Special Love

Unang pelikula na pinagtambalan nina John Lloyd Cruz at Sarah Geronimo. Nakakaintriga ang pelikulang ito dahil hindi naman talaga love team sina Sarah at JLC. Pero teaser pa lang nito siguradong alam mo na maraming manonood. Nakakakilig yung teaser tapos yung chemistry nila talagang ang ganda. Bagay na bagay si Sarah sa pagiging komedyante niya at kwela at si JLC bilang seryosong karakter.

Ito ay kuwento nina Miggy Montenegro (John Lloyd Cruz) at Laida Magtalas (Sarah Geronimo). Sikat ang pamilya ni Miggy dahil maraming negosyo ang kaniyang mga magulang na pinamamahalaan ng kaniyang mga kapatid. Si Miggy ang namahala ng Flippage na isang magazine para sa mga lalaki. Nag-aaral pa lang si Laida nang magkacrush siya kay Miggy kaya sinabi niyang balang aral magkakakilala din sila. At hindi nga nagkamali si Laida dahil natanggap siya sa Flippage bilang assistant dito. Pero ang hindi niya inaasahan ay ang ibang Miggy pala ang makikilala niya. At dito nagsimula ang kwela at makulit na paghanga at pagpapaibig sa isang Miggy Montenegro.

2. Crazy Beautiful You (2015)

Paano bang hindi ito masasama sa listahan eh isa sa pinakasikat na love team ng bagong henerasyon ngayon sina Daniel Padilla at Kathryn Bernardo na mas kilala bilang Kathniel. Swak na swak sa mga teens ang mga pelikula nila. Ang ganda nung sinematograpiya ng movie, kakaiba at dito mo unang nakita. Maganda din yung pagsasama nila ng mga tribe na bihirang mangyari na sa mga pelikula ngayon.

Ito ay kuwento nina Jackie (Kathryn Bernardo) at Kiko (Daniel Padilla). Dahil sa paghihiwalay ng ina at ama ni Jackie siya ay nagrebelde. Marami siyang ginagawang mga kabulastugan at kalokohan. Kung kaya napagpasyahan ng kaniyang mga magulang na isama si Jackie sa kaniyang ina sa isang medical mission. At dito nakilala niya si Kiko na anak sa labas ng mayor. Si Kiko ang naging guide ng ina ni Jackie at niya sa medical mission. Nagkagusuhan sina Kiko at Jackie ngunit nalaman ni Kiko na gusto din si Jackie ng kaniyang kinakapatid at legal na anak ng mayor na si Marcus. Kung kaya nagparaya si Kiko para dito.

3. Diary ng Panget: The Movie (2014)

Mula sa sikat na Wattpad na nobela sa kaparehong pamagat ang pelikulang ito. Ito ang unang pagtatambal nina James Reid at Nadine Lustre. Hindi inaakala ng lahat na hahakot ng maraming manonood ang pelikulang ito dahil ng panahong iyon hindi pa man sikat at kilala ang love team na Jadine. Ngunit dahil sa simpleng istorya at nakakakilig na chemistry nina Reid at Lustre kung kaya tumabo sa takilya ang pelikula.

Ito ay kuwento nina Eya (Nadine Lustre) at Cross (James Reid). Si Eya ay isang mahirap na naging katulong sa mayaman at gwapong si Cross. Lahat ng utos ni Cross ay sinusunod ni Eya. Parehong pumapasok sa iisang paaralan sina Eya at Cross pero sa school parang hindi sila magkakilala. Madalas na hindi magkasundo ang dalawa ngunit ng lumaon naging maganda ang kanilang pagtitinginan lalo nang gumanda at mag-ayos na si Eya.

4. Maging Sino Ka Man (1991)

Pinagbibidahan nina Robin Padilla at Sharon Cuneta. Ang astig lang nitong movie na ito. Nakakatuwa at nakakakilig yung mga eksena nina Padilla at Cuneta. Tanging si Robin lang talaga ang nakakagawa ng ganitong klaseng pelikula. Yung halong astig, aksyon pero yung love story pang teens ang istilo. Hindi nakakasawang panoorin at balik balikan.

Ito ay istorya ni Monique (Sharon Cuneta) na isang sikat na singer. Tumakas siya mula sa kaniyang bahay dahil sa pagtatangka sa kaniyang buhay ng kaniyang stepfather. Sa pagtakas niya nagpanggap siyang si Digna at namuhay bilang ordinaryong babae na maraming trabaho. Nakilala niya si Carding (Robin Padilla) na isang magnanakaw na minsang habulin siya ng mga naghahanap sa kaniya. Nalaman niyang kaya ito nagnanakaw ay dahil sa mga ampon nitong bata na nakatira sa kaniya.

5. Ang Utol kong Hoodlum (1991)

Isa sa mga pelikula ni Robin na hindi ko makakalimutan ay ang Ang Utol kong Hoodlum. Dahil sa tagumpay ng palabas nagkaroon ito ng part 2. Yung buong set up ng kuwento ay sa Baguio ginanap.

Ito ay istorya ni Ben (Robin Padilla) at Bing (Vina Morales) kung saan umibig si Bing sa isang barumbadong si Ben na hari ng buong lugar nito sa Baguio.

6. Got 2 Believe (2002)

Pinagbibidahan nina Claudine Barreto at Rico Yan. Ang pamagat ay kinuha sa sikat na kantang “Got to Believe in Magic” na siyang naging theme song ng pelikula.

Si Toni (Claudine Barretto) ay isang wedding coordinator na naniniwala sa true love. Lagi siyang bridesmaid pero never the bride. Samantalang si Lorenz (Rico Yan) ay isang wedding photographer. Madalas niyang makunan si Toni sa mga nakakatuwa nitong expression at anggulo. Isang araw tinawag siya ng kaniyang boss at inutusan siyang gumawa ng isang pictorial kay Toni. Sinabi niya ito kay Toni ngunit hiniling nito na papayag siya kung tutulungan siyang makahanap ng mapapangasawa. Sa paghahanap nila ng tamang lalaki umibig sila sa isa’t isa.

7. labs kita… Okey ka lang? (1998)

Sino ang makakalimot sa sikat na linyang “Yes kaibigan mo ko… kaibigan mo LANG ako… And I’m so stupid  for making the biggest mistake  of falling inlove with my bestfriend…” ramdam na ramdam ko yung lines n yan. Kasikatan pa noon ng Marvin and Jolina loveteam.

Si Bujoy (Jolina Magdangal) ay matagal ng lihim na nagmamahal sa kaniyang kaibigan na si Ned (Marvin Agustin). Magkasama na sila mula pa noong bata pa sila hanggang sa lumaki sila. Ngunit hindi ito napapansin ni Ned dahil bestfriend lang talaga ang turing nito kay Bujoy. Ngunit ng lumayo si Bujoy naramdaman ni Ned ang pangungulila niya sa dalaga.

8. Dahal Mahal na Mahal Kita (1998)

Kakaibang Claudine Barretto ang makikita sa pelikulang ito. Ang love team nila ni Rico Yan ay sinamahan ni Diether Ocampo.

Si Mela (Claudine Barreto) ay ang bad girl ng kanilang campus samantalang si Miguel (Rico Yan) ay ang matalinong istudyante. Hindi inaasahan ng lahat na magdadate at magkakagustuhan ang dalawa. At ng maging sila binago ni Mela ang kaniyang sarili para kay Miguel. Maging ang kaniyang pananamit at itsura ay pinalitan niya. Ngunit ang kanilang pagkakaiba ang naging dahilan ng madalas nilang pag-aaway. At sa isang pangyayari inakala ni Miguel na niloko siya ni Mela na naging dahilan ng kanilang paghihiwalay ng tuluyan.

9. One More Chance (2007)

Ang klasikong pelikula na tumabo ng malaki sa takilya ay ang One More Chance nina John Lloyd Cruz at Bea Alonzo. Dinagsa ang palabas dahil sa ganda ng istorya at mga linyang tagos sa puso. Isa ito sa mga hindi malilimutang pelikula pagdating sa romance. At ilan sa mga hindi makakalimutang linya ni Basha ay ang “Ako na lang, ako na lang ulit” na sinagot ni Popoy ng “She had me at my worst… you had me at my best… And you chose to break my heart”.

Ito ay kuwento nina Basha (Bea Alonzo) at Popoy (John Lloyd Cruz). Masyadong nasakal si Basha sa pagmamahal ni Popoy na humatong sa halos hindi na niya kilala ang kaniyang sarili. Kung kaya napagpasyahan niyang makipagbreak dito at umalis upang hanapin ang kaniyang sarili. Nahirapan magmove on si Popoy kung kaya araw araw niyang pinupuntahan si Basha na hindi naman hinaharap ni Basha. Hanggang sa lumipas ang panahon at muling bumalik si Popoy kasama ang bago nitong girlfriend at hilingin ni Basha na siya na lang muli ang kaniyang mahalin.

10. Forevermore (2002)

Sinong makakalimot sa mga umiilaw na puno ng mangga? Ito ang pelikulang pinagsamahan nina Jericho Rosales at Kristine Hermosa na Forevermore.

Si Anton (Jericho Rosales) ay isang magaling na arkitekto. Dahil tumatanda na ang kaniyang lolo napilitan siyang umuwi sa probinsya nito at mamahala sa kanilang asyenda. Muli niyang nakita dito ang kaniyang kababata na matagal ng may gusto sa kaniya na si Marian (Kristine Hermosa). Si Marian ang kaniyang naging gabay habang namamahala pansamantala sa asyenda. Naniniwala si Marian at ang kaniyang lolo na sila ni Anton ang muling makakagawa ng alamat. Ayon sa matanda muling tatamis at magiging masagana ang mga bunga ng puno ng  mga manga kung magkakaroon ng tunay na pagibig.

Kayo ano ang pinakanakakakilig na movie para sa inyo? 

Official Poster: Mano Po 7: Chinoy

Ang serye ng Mano Po ay muling nagbabalik sa ikapitong pelikula nitong " Mano Po 7: Chinoy". Ito ay pagbibidahan ng pinagsama samang artista ng henerasyon ngayon. Kasama sina Enchong Dee, Jean Garcia, Janella Salvador, Jake Cuenca, Jessy Mendiola, Kean  Cipriano, Marlo Mortel, Jana Agoncillo at Richard Yap. Ito ay mapapanood sa lahat ng sinehan sa Disyembre 14, 2016.

 

Ito ay kuwento ng isang ama kung paano ang buong pamilya niya ay umasam sa pagmamahal na hindi niya naibigay. Mga anak na humihingi ng atensyon sa kaniyang ama at asawang umaasam na muling madama ang pagmamahal.

Kitang kita ang ganda ng sinematograpiyang handog ng palabas na ito. At mukhang maganda ang istorya na siguradong makakarelate ang maraming pamilya sa sitwasyon na nangyayari sa kuwento. Paniguradong tutulo ang luha mo sa galing ng pag-arte ng mga karakter.

Tuklasin ang mga aral pampamilya na nakapaloob sa pelikulang handog ng Regal Films at sa direksyon ng award winning direktor na si Ian Lorenos.