Ang Babae sa Septic Tank 2: #ForeverIsNotEnough – Movie Review

Theater Movie Poster

Petsa nang Pagpapalabas: Disyembre 25, 2016

Haba nang Pelikula: 1oras 25minuto

Direktor: Marlon Rivera

Kategorya: Komedya

Panulat ni: Chris Martinez

Prodyusers: Chris Martinez, Marlon Rivera

Bida nang Pelikula:

• Eugene Domingo bilang si Eugene Domingo/Romina – demanding na aktres na gaganap bilang  si Romina sa pelikulang The Itinerary.
• Jericho Rosales bilang si Cesar – napili ni Domingo na gumanap na Cesar sa kanilang pelikula kapalit ni Joel Torre.
• Kean Cipriano bilang si Rainier – direktor ng pelikulang The Itinerary na may problema sa kaniyang asawa.
• Cai Cortez bilang si Jocelyn – line producer ng pelikulang The Itinerary.
• Khalil Ramos bilang si Lenon – batang production designer ng The Itinerary.
• Joel Torre bilang si Cesar – orihinal na pinili ni Rainier na gaganap sa papel na Cesar.

Musika ni: Von de Guzman

Taga-ayos: Marya Ignacio

Kumpanya ng Produksyon: Martinez Rivera Films, Quantum Films, Tuko Film productions, Buchi Boy Films, MJM Productions

Taga-pamahagi: Quantum Films

Bansa: Pilipinas

Lingguwahe: Tagalog, Filipino

Buod:

Gagawa muli ng pelikula si direk Rainier at gusto niyang si Eugene Domingo ang gumanap na Romina na bidang babae. Kung kaya inimbitahan ni Domingo si Rainier, Jocelyn ang line producer at Lenon ang production designer sa The Farm El Corazon upang pag-usapan ang pelikula. Habang nagrerelax sila maraming suhestiyon si Domingo na mga pagbabago. Una gusto niyang palitan ang kaniyang makakapareha. Nauna nang napili ni direk Rainier si Joel Torre ngunit gusto itong palitan ni Domingo at gawing si Jericho Rosales. Pangalawa gusto niyang magkaroon ng bestfriend sa palabas si Romina at ang gaganap nito ay si Vice Ganda sa halip na si Agot Isidro na gusto ni Jocelyn. Pangatlo ang magkaroon ng hugot linya sa isang eksena sa restaurant nila ni Jericho. Pang-apat ang magkaroon ng eksena sa sunset. At panghuli palitan ang setting ng session road at gawin sa Burnham park. Sa dami ng suhestiyon ni Domingo halos naiiba na ang istorya na nakikita ng direktor sa kuwento. Sa mga oras ding iyon may problema na si Rainier at ang kaniyang asawa. Nais sana niyang ialay ang pelikulang ito sa kaniyang asawa upang punuan lahat ng kaniyang pagkukulang dito ngunit nalaman niya sa text mula dito na iniwan na siya at umalis na kasama ang kanilang anak. Sa huli hindi na natuloy ang pelikula sa ilalim ng direksyon ni Rainier.

Pagsusuri:

Ang pelikula ay isa sa naging kalahok sa Metro Manila Film Festival 2016 sa ilalim ng direksyon ni Marlon Rivera. Ito ay ang pangalawang pelikula ni Eugene Domingo at ang una ay ‘Ang Babae sa Septic Tank’ kung saan pumasok sa tangke ng dumi si Domingo.

Noong una hesitant ako manonood ng mga indie movies since maliit ang budget nila for production baka hindi maganda at tinipid lng ito ngunit nagkamali ako. Hindi man ganoon kalaki ang pondo nila, dinala naman ito ng magandang istorya at kuwento.

Maganda ang nais ipahiwatig na mensahe ng direktor na si Rivera. Nagpapakita ito ng tunay na mga pangyayari at tunay na nagaganap sa pagbuo ng isang pelikula. Ang pagpili ng mas batang bida sa mga palabas ay maaring humakot at tangkilikin ng manonood. Ang pagkakaroon ng mga mga linyang tatak ay tiyak na makakapg-paalala sa iyo ng pelikula. Ngunit nais ipaliwanag ng palabas na ‘Ang Babae sa Septic Tank 2: #ForeverIsNotEnough’ na hindi ito ang tunay na nangyayari sa tunay na buhay. Inililigaw lang tayo ng mga palabas upang maniwala sa mga happy ending. Pansamantalang paglimot habang nanonood ng pelikula na ginawa sa imahinasyon ngunit pag-uwi natin muli nating haharapin ang mga problema. Ika nga ni Domingo walang nanonood ng pelikula kung mga sufferings lang din ang makikita, siguradong hindi ito papanoorin. Ganito na ang sistema ng pelikula sa ating bansa.

Malalim ang pinanggagalingan ng istorya nito. Kung titingnan akala sa una isang nakakatawang kuwento lang ito at nais lang magpasaya. Ngunit pinakikita nito ang katotothanan. Isang katotohanan na bihirang gawin ng mga malalaking kumpanya sa kadahilanan baka hindi kumita ang kanilang palabas. Hindi nito sinasabi na wala ngang forever pero karamihan ng totoong sitwasyon na nakikita natin sa ating mga napapanood ay hindi makatotohanan. Pinapaniwala tayo upang bigyan ng pag-asa at mapasaya kahit panandalian lamang.

Hindi matatawaran ang pagganap ni Domingo, tanging siya lang ang nababagay sa mga ganitong klaseng pelikula. Magaling din ang support cast nina Cortez, Rosales, Torre, Ramos, at Cipriano. Hindi man big time ang production nila ngunit magandang mensahe naman ang naipaabot nito sa mga manonood.

Madalas sa mga indie movies gaya nito ay tumatalakay sa mga tunay na sitwasyo at pangyayari ng ating bansa. Sana ito ay maging simula ng mas marami pang pelikula na magmumulat sa atin at magbibigay kaalaman sa lahat. Nawa’y tangkilin din natin ang mga ganitong klaseng palabas. Siguradong magiging bukas isip tayo at mas malalaman natin ang mga pangyayari sa ating paligid.

Saludo ako sa mga tao sa likod ng mga pelikulang gaya nito.

Mang Kepweng Returns: Movie Review

Theater Movie Poster

Petsa nang Pagpapalabas: Enero 4, 2017

Haba nang Pelikula: 1oras 47minuto

Direktor: Giuseppe Bede Sampedro

Kategorya: Komedya

Istorya ni: GB Sampedro, Volta delos Santos

Panulat ni: Volta delos Santos

Prodyusers: Patrick F. Meneses, Ladylyne S. De Guzman

Bida nang Pelikula:

• Vhong Navarro bilang si Kiefer/Mang Kepweng – itinakdang magmana ng mahiwagang bandana, nakakapagpagaling ng may sakit at sinasapian ng masasamang ispiritu.
• Kim Domingo bilang si Allysa – iniibig ni Mang Kepweng.
• Jacklyn Jose bilang si Milagros – mapag-arugang ina ni Kiefer/Kepweng.
• Sunshine Cruz bilang asawa ni Zacharias – sinapian ng masamang ispiritu na pinagaling ni Kepweng.
• James Blanco bilang si Zacharias – kapatid sa ama ni Kepweng sa ama at isang mabait na doktor
• Louise delos Santos - kapatid ni Sunchine Cruz.
• Juancho Trivino – kaibigan ni Kepweng.
• Pen Medina bilang si Ingkong Kapiz – isang masamang albularyo na gusting patayin si Kepweng.
• Jackie Rice bilang si Prinsesa Alisandra – prinsesa na nangangalaga sa bandana at aklat ng karunungan.
• Valeen Montenegro bilang Rachel – balat kayo ni Ingkong kapiz na ginamit panlaban kay Kepweng.
• Jhong Hilario – balat kayo ni Ingkong Kapiz na ginamit panlaban kay Kepweng.

Musika ni: Carmina Cuya

Taga-ayos: Tara Illenberger, Geoffrey William

Taga-pamahagi: Cineko Productions, Viva Films

Bansa: Pilipnas

Lingguwahe: Tagalog, Filipino

Buod:

Isang mabait at may takot sa Diyos si Kiefer. Inalagaan siya at inaruga ng kaniyang ina. Ngunit madalas na silang guluhin ng masamang albularyo upang patayin si Kiefer. Kung kaya napagpasyahan ng kaniyang ina na ipagtapat ang tunay niyang katauhan. Si Kiefer ay anak ni Kepweng na isang kilalang magaling na albularyo. Kapatid niya sa ama si Zacharias na isang doktor. Ang asawa ni Zacharias ay may sakit na hindi niya mapagaling galing, kung kaya sinubukan niyang gamitin ang mahiwagang bandana ng kaniyang ama ngunit hindi nito napagaling ang kaniyang asawa. Hanggang malaman niya na may kapatid siya sa ama na si Kiefer. Sinabi ng isang engkantanda sa ina ni Kiefer na siya ang itinakdang magmana ng mahiwagang bandana kung kaya noong sinubukan niyang gamitin at pagalingin ang asawa ng kaniyang kapatid ay gumaling ito. Mula noon ginamit ni Kiefer ang bandana at naging Mang Kepweng. Pinagaling niya ang mga may sakit at pinaalis ang mga masasamng ispiritu ng walang hinihinging kapalit. Ngunit patuloy silang ginugulo ng masamang albularyo na si Ingkong Kapiz. Ginamit pa niya ang nagugustuhan ni Kepweng na si Allysa upang patayin ito. Ngunit hindi siya nagtagumpay sa kaniyang maitim na balak.

Pagsusuri:

Ang pelikula ay kasabay na ipinalabas sa kaarawan ng bida nitong si Vhong Navarro. Si Navarro ay si Mang Kepweng na dating ginampanan din sa pelikula ni Chiquito.

Simple lang ang kuwento masyado lang madaming paligoy-ligoy upang pahabain lang ito. Madaming eksena ang hindi naman kinakailangan at hindi na din nakakatulong sa palabas. Kung kaya lumabas na nakakainip at mabagal ang istorya.

Natural ng nakakatawa si Navarro ngunit halos parang siya lang ang nagbubuhat ng buong pelikula upang maging katawa tawa na minsan nagiging trying hard na at hindi nakakatuwa.

Masyado na din common ang mga paraan ng pagpapatawa na hindi na bago sa manonood.

Hindi man ganoong kabihasa sa pagpapatawa si Jose ay pumilit naman siyang tumulong kay Navarro sa mga eksena ng pagpapatawa. Sa baguhang si Domingo hindi siya masyadong naramdaman sa pelikula.

Walang bago sa kuwentong ito isang simpleng kuwento na nais lang magpasaya.

Mano Po 7: Chinoy – Movie Review

Theater Movie Poster

Petsa nang Pagpapalabas: Disyembre 14, 2016

Haba nang Pelikula: 1oras 57minuto

Direktor: Ian Loreños

Kategorya: Drama

Prodyusers: Regal Entertainment

Bida nang Pelikula:

• Richard Yap bilang si Wilson Wong Sr. – isang magaling na Chinese businessman at palaging walang oras sa kaniyang pamilya, ama nina Wilson, Caroline at Catherine, asawa ni Debbie.
• Jean Garcia bilang si Debbie Wong – asawa ni Wilson, may-ari ng isang jewelry shop at butihing ina sa kanilang mga anak.
• Janella Salvador bilang si Carol Wong – gustong maging singer ngunit kinuha ang pag-aaral ng cielo dahil ito ang gusto ng kniyang ama.
• Enchong Dee bilang si Wilson Wong Jr. – addict na anak ni Wilson na pumasok ng rehabilitation upang magpagaling.
• Marlo Mortel bilang si Henry – kaklase ni carol sa iskuwelahan.
• Jessy Mendiola bilang si Jocelyn Lee – nakasama ni Wilson Jr. sa rehabilitation at naging fiancée nito.
• Jana Agoncillo bilang si Catherine Wong – bunsong anak ni Wilson Sr.
• Eric Quizon bilang si Jason Wong – kapatid ni Wlison Sr. na gay.
• Jake Cuenca bilang si Marco – customer ni Debbie sa Jewelry shop na naging close sa kaniya.
• Kean Cipriano bilang si Denver – propesor ni Carol sa pag—aral ng cielo.

Taga-pamahagi: Regal Entertainment

Bansa: Pilipinas

Lingguwahe: Filipino, English, Chinese

Buod:

Isang successful businessman si Wilson Wong Sr. may mapagmahal na asawa at mga anak. Ngunit sa papel ng pagiging ama at asawa ay nabigo siya. Ito ang naging dahilan ng maraming conflict sa kaniyang pamilya. Nagkaroon ng malapit na kaibigan ang kaniyang asawa na naging dahilan ng kanilang paghihiwalay. Si Wilson Jr. ang panganay na anak ay naging addict at pinasok sa rehabilitation na nakilala niya naman ang kaniyang fiancée na si Jocelyn. Samantalng si Caroline ay hinarass ng kaniyang propesor sa cielo, mabuti na lang pinagtanggol siya ni Henry ang kaniyang kaklase. Unti unting nagbago ang ugali ni Wilson Sr. at sinikap na maging mabuti sa kaniyang pamilya upang subukang ayusin to.

Pagsusuri:

Isa ang pelikulang ito sa hindi nakapasok sa MMFF 2016 kung kaya napagpasyahan na ipalabas ng mas maaga sa mga sinehan. Ito ay kuwento ng isang tipikal na pamilyang Chinese na sinubok ng maraming problema.

Punong puno ang bawat eksena ng maraming pangyayari tungkol sa bawat isang miyembro ng pamilya ni Wong. Pinatas at sunod na sunod na naipahayag ito na hindi naguguluhan ang mga manonood. Ngunit may mga parte na bitin at parang nanghuhula ka sa kung ano bang kinahinatnan nito. Kagaya na lamang nung naharass si Carol, halos wala ng sunod na pangyayari kung ano bang kinalabasan ng eksenang iyon. Naiwan kang nagtatanong at nanghuhula. Ngunit ang mga aral ay maayos pa din nailahad ni Loreños.

Simple lang yung script. At may ilang mga linya na nagamit upang mas maipaabot ang mensahe sa mga manonood ngunit walang tumatak na linya na maalala mo. Walang maemosyong dayalogo na palagi mong maalala para sa pelikulang ito.

Maayos na nagampanan ni Yap ang papel ng isang Wilson lalo na sa pisikal na kaanyuan at pananalata, halatang ang dugo ng isang Chinese. Hindi din matatawaran ang galing ng batikang actress na si Jean Garcia na tiyak mararamdamn mo ang lahat sa bawat buka niya ng kaniyang bibig. Kaunting training pa para kina Mendiola, Dee at Salvador. Kulang pa ang emosyon na naibigay nila upang mas maramdaman sila sa pelikula.

Nakatulong din sa pelikula ang magandang lugar ng Taiwan na mas nakapagparamdam ng buhay Tsinoy.

Sa kabuuan maraming aral ang naibigay ng palabas na ito. Ngunit ito yung pelikula na hindi mo na ulit uuliting panoorin pa. Ang isang beses ay sapat na.

Enteng Kabisote 10 and the Abangers: Movie Review

Theater Movie Poster

Petsa nang Pagpapalabas: Nobyembre 30, 2016

Haba nang Pelikula: 1oras 50minuto

Direktor: Marlon N. Rivera, Tony Y. Reyes

Kategorya: Pantasya, Komedya

Prodyusers: Orly Ilacad, Marvic Sotto

Bida nang Pelikula:

•  Vic Sotto bilang si Enteng Kabisote – mortal na tao at dakilang tagapagligtas ng Engkantasya.
• Epy Quizon bilang si Dr. Kwak Kwak – kalaban na gustong sirain ang mundo sa pamamagitan ng isag game application.
• Oyo Sotto bilang si Benok Kabisote – anak ni Enteng na isang engkantado na naging NBI sa mundo ng mga tao.
•  Jose Manalo bilang si Lola Tinidora/Tini – isang OEW at may kapangyarihan na kumilos ng mabilis.
• Wally Bayola bilang si Lola Nidora/Nini – isang OEW at may kapangyarihan na maging malakas ang boses.
• Paolo Ballesteros bilang si Lola Nidora – isang OEW at may kapangyarihan na kontrolin ang isipan ng mag lalaki.
• Kakai Bautista bilang si Puring/Ora/Oring – isang OEW at may kapangyarihan na makita ang hinaharap.
• Jerald Napoles bilang si Lucas – isang OEW at may kapangyarihan na maging malakas.
• Jelson Bay bilang si Remy – isang OEW at may kapangyarihan na gawing plantsa ang kaniyang mga kamay.
• Sinon Loresca Jr. bilang si Bistika – isang OEW at may kapangyaraihang maging invisible.
• Ryzza mae Dizon bilang Bubu – anak ni Remy.
• Alonzo Muhlach bilang si Benokis Kabisote – anak ni Benok.
• Bea Binene bilang si A2 – gumawa ng Slashman application game.
• Ken Chan bilang si A1 – katulong ni A1 sa paggawa ng Slashman application game.
• Ryza Cenon bilang asawa ni Benok.

Base sa: Okay ka, Fairy Ko

Taga-pamahagi: OctoArts Films, M-Zet Productions, APT Entertainment

Bansa: Plipinas

Lingguwahe: Tagalog, Filipino

Buod:

Ginamit ng masamang si Dr. Kwak Kwak ang larong Slashman upang maghasik ng kasamaan sa mundo. Ngunit ang kaniyang kapangyarihan ay hindi sapat upang magamit ito ng lubos. Kaya kailangan niyang hanapin ang pitong OEW o Outcast Enkantasia Workers upang gamitin at kunin ang kapangyarihan ng mga ito. Ngunit hindi ito natuloy dahil tinulungan sila ni Enteng Kabisote sa paglaban sa kasamaan.

Pagsusuri:

Muling nagbabalik si Vic Sotto sa isa na namang pelikula ng pantasya at komedya na ‘Enteng Kabisote 10 and the Abangers’. Sinamahan pa siya ng pitong magagaling na komedyante sa pangunguna ng mga Lola sa sikat na kalye serye ng Eat Bulaga.

Nagsimula ang kuwento sa kagustuhang gamitin ni Dr. Kwak Kwak ang kapangyarihan ng pitong OEW upang maghasik ng kasamaan at sa tulong ni Enteng tinulungan niyang hindi ito magtagumpay.

Mas dinagdagan pa nina direktor Reyes at Rivera ang aasahan sa isa na namang installment ni Bossing na hango sa sikat na ‘Okay ka, Fairy ko’. Dumami ang mga cast at nagbigay daan din upang maglabas ng panibagong kapangyarihan si Kabisote. Mabilis ang paglalahad ng kuwento at hindi ito nakakainip. Ngunit hindi ito napuno ng komedya kagaya ng mga nakaraang pelikula.

Maraming pagpapaalala at pangangaral ang karamihan sa linya sa palabas na ito. Nagpapakita lamang na ang kanilang pelikula ay hindi lang basta nagpapatawa kundi nagpapaalala sa lahat ng tao na lahat ng labis ay masama. Bagaman hindi ganoong nakakatawa matutuwa pa din ang mga bata dahil sa mga kakaibang kapangyarihan na handog nito.

Natural pa din kay Sotto ang pagpapatawa ngunit karamihan sa kaniyang mga punchlines ay hindi na bago kaya hindi na ganoong nakakatawa. Pero saludo pa din kay Bossing sa walang sawang pagpapakita ng mga kakaibang kuwento ng pantasya. Tunay ngang nag-iisa lang ang Vic Sotto ng industriya ng pelikulang Plipino. Nakakatuwa din ang pitong Abangers na mas nakadagdag ng katuwaan sa buong kuwento.

Nakatulong din bagaman halos walang kaugnayan ang magandang lugar ng Bohol na isinama sa pelikula. Sa kabuuan tiyak na katutuwaan ito ng mga bata.

Ating tulungan at puksain ang masamng si Dr. Kwak Kwak sa ‘Enteng Kabisote 10 and the Abangers’.

Vince & Kath & James: Movie Review

Theater Movie Poster

Petsa nang Pagpapalabas: Disyembre 25, 2016

Haba nang Pelikula: 1oras 56minuto

Direktor: Theodore Boborol

Kategorya: Teen Romance

Panulat ni: Daisy G. Cayanan, Kim R. Noromor at Anjanette M. Haw

Prodyusers: ABS-CBN Film Production

Bida nang Pelikula:

• Julia Barretto bilang si Kathleen/Kath – mechanical engineering na istudyante, mapagmahal at gagawin lahat para sa kaniyang pamilya.
• Joshua Garcia bilang si Vince/Var – electrical engineering na istudyante, anak sa pagkakasala ng kaniyang ina, laging sinasalo sa mga problema si James na kaniyang pinsan, matagal nang may gusto kay Kath.
• Ronnie Alonte bilang si James – varsity player sa basketbol, nagkagusto kay Kath, laging pinapasa ang problema niya kay Vince.
• Maris Racal bilang si Maxine – matalik na kaibigan ni Kath.
• Ina Raymundo bilang ina ni Vince.
• Shamaine Buencamino bilang ina ni Kath – iniwan ng kaniyang asawa at mag-isang itinataguyod ang kaniyang pamilya.
• Ana Abad Santos bilang si Beatrice – ina ni James.
• Jeric Raval bilang ama ni James.
• Allan Paule bilang ama ni Kath.
• Milo Elmido Jr. bilang si Clinton – bading na kaibigan ni Vince.

Sinematograpiya: Gary Gardoce

Base sa: Vince and Kath ni Jenny Ruth Almocera

Taga-pamahagi: Star Cinema

Bansa: Plipinas

Lingguwahe: Tagalog, Filipino

Buod:

Si Kath ay isang mechanical engineering student na tumutulong sa kaniyang ina upang itaguyod ang kanilang pamilya matapos silang iwan ng kaniyang ama para sa ibang pamilya. Kabatchmate niya si Vince na isa namang electrical engineering student. Madalas asarin ni Vince si Kath dahil may lihim siyang pagtingin sa dalaga. Hindi ni Vince maligawan si Kath kaya idinaan na lang niya ang kaniyang mga gustong sabihin sa pamamagitan ng isang blog na the TheVinciQuotes na fan pala si Kath. Nang makita ng pinsan niyang si James si Kath nagustuhan agad ito ng kaniyang pinsan ngunit hindi naman pinapansin ni Kath ang mga text ni James kung kaya nagpatulong ito kay Vince na nagpanggap naman na si Var upang maging textmate sila.Unti unting nahulog si Kath sa mga text ni Var, ngunit nang kailangan ng magkita si James na ang nakipagmeet kay Kath. Makakaya kaya ni Vince na makita sina James at Kath? Pagbibigyan pa rin kaya niya ang kaniyang pinsan?

Pagsusuri:

Isang teen romantic film ang magpapakilig sa atin sa pelikulang Vince & Kath & James na pagbibidahan nina Julia Barretto, Joshua Garcia at Ronnie Alonte. Ito ang isa sa mga pelikula na masasabi nating hindi kailangan ng mga intimate moment para kiligin at matuwa sa isang palabas. Bagay na bagay sa mga kabataan ng makabagong panahon.

Ito ay kuwento ng tatlong istudyante na may kani kaniyang problemang hinarap upang mas makilala pa ang kanilang mga sarili. Si Vince ay matagal ng may gusto kay Kath na hindi niya masabi sa dalaga, kung hindi pa dumating si James na pinsan nito hindi nito ipaglalaban ang kaniyang sarili at pagmamahal para kay Kath.

Sa direksyon ni Theodore Boborol, pinakilig at pinasaya tayo ng palabas na ito. Maayos na nailahad ang problema ng bawat isa ngunit hindi masyadong na emphasize yung kung conflict sa pagitan ng tatlong bida. Nais lang nitong ipabatid na may mas mahalaga pang problema bukod sa problemang pang puso at ito ay ang usaping pampamilya.

Ang simple at magaan yung mga linya sa pelikula. Hindi ito masyadong malalim dahilan upang mas madaling maipaabot ang mga mensahe at aral na nais nitong maiparating sa mga manonood. Madaling maintindihan at maayos na naibigay ng mga bida ang kanilang layunin sa pelikula. Ilan sa mga aral dito ay ang pag-aaral nang mabuti, mahalin ang pamilya at matutong mahalin ang sarili at ipaglaban ang nararapat para sa iyo.

Nakakakilig din ang mga kantang ginamit, tamang tama at swak na swak sa panlasa ng bagong henerasyon ngayon.

Napakagaling at natural nang pag-arte ni Barreto, hindi ito pilit at halatang malaki na ang kaniyang pinagbago mula ng magsimula siya. Samatalang si Garcia naman ay nakikita mo ang isang batang John Lloyd Cruz sa kaniya. Sa mga aksyon at kilos at maging sa pag-iyak ay parang si Lloydie talaga. Hindi ko naramdaman ang pag-arte ni Alonte, kailangan pa niya nang pagsasanay upang mas maging convincing ang kaniyang pag-arte. 

Sa kabuuan maraming aral sa buhay ang naibahagi ng pelikula lalo na sa mga kabataan ngayon. Silipin at kilalanin ang buhay nina Vince & Kath & James.

Ang Pagsusuri: Dear Alex, Break na Kami Paano?! Love Catherine

May-akda: Alex Gonzaga

Kategorya: Non-fiction

ISBN: 978-971-816-122-7

Sikat na Linya:

Bukod sa mga Alex advice ito yung mga sinabi niya na gustong gusto ko.

“A relationship you keep on hiding is not worth keeping. “– Alex Gonzaga –

“If the guy loves me, he should love my God First.” – Alex Gonzaga –

Pagsusuri:

Ito yung first book ni Alex Gonzaga tungkol sa survival guides sa breakup. Ikinuwento niya dito ang kaniyang sariling experiences tungkol sa tatlong taong nagpatibok ng kaniyang puso. At kung paano siya binago ng mga karanasang ito.

Aakalain mo nung una na ang nakakatawang Alex ang mababasa mo sa librong ito. Ngunit hindi pala, isang Alex na seryoso at hindi mo aakalain na marami ng pinagdaanan ang buhay pag-ibig niya. Hindi pa din nawala yung pagkakwela niya na mas nakapagpagaan ng pagbabasa ng aklat na ito.

Nagbigay siya ng mga gabay kung paano malampasan ang breakup pati mga kanta at pelikula na maaring mong panoorin at pakinggan. Inisa –isa din niya ang mga dahilan ng breakup at mga dapat at hindi dapat gawin habang nasa proseso ng pagmomove-on.

Maayos ang pagkakasunud-sunod ng mga puntos na gustong ibigay ng may-akda. Gumamit siya ng mga halimbawa at ilang kuwento upang mas mabigyang liwanag ang ilang mga gabay. Entertaining at puno ng aral ang kuwentong ito at maayos itong naipaabot sa mga mambabasa.

Marami rin ang makakarelate dito dahil aminin natin dumaan tayong lahat sa yugto ng ating buhay na nasawi tayo sa pag-ibig. Mas narealize lang natin na tama ang mga sinabi ni Alex, at madami sa atin ang gumawa din ng mga kalokahan sa pagmamahal. Kung babalikan natin ngayon ay matatawa na lang tayo dahil sabi nga sa aklat naging daan ito upang mas maging mabuting tao tayo.

Sa huli, dalawang bagay ang aking natutunan at natuon sa aking kaisipan. Una, hindi masamang maging single. Sabi nga nila ang pagiging single ay choice natin. Hindi natin ikakamatay kung mag-isa tayo dahil andyan ang ating mga kaibigan at higit sa lahat ang ating pamilya na tutulong sa atin. Hindi natin kailangang mag-isa dahil hindi naman talaga tayo mag-isa. Kailangan nating makilala ang ating sarili ng tayo lang dahil pag nakilala natin ang ating sarili dito lang natin malalaman ang tunay na gusto at kailangan natin. Pangalawa, pagkakaroon ng relasyon kay God. Madalas sa atin nakakaalala lang kay God pag may kailangan o problema tayo. Gumawa tayo ng relasyon kay God, sabihin natin sa kaniya lahat, kung masaya tayo, kung  malungkot tayo at kung may problema tayo. Dahil alam niya kung ano kailangan natin at alam niya kung ano dapat ibigay sa atin. At higit sa lahat alam niya kung kailan ito ibibigay sa atin. Lagi tayong nagtatanong kung bakit ganito at bakit ganyan. Hindi natin kailangan magtanong dahil alam niya ang kailangan natin hind man natin ito sabihin. Nakikita niya at nararamdaman niya ito dahil mahal niya tayo.

Sa kabuuan isang paggising sa lahat ng kababaihan ang librong ito. Maari tama o mali ito base sa iyong karansanan ngunit kapupulutan ito ng aral ng lahat ng taong nagmahal at nagmamahal.